Burkĩnd Võore
Burkĩnd Võore
Mam sẽn wa n tar yʋʋm a nu bɩ a yoobe, mam da wʋmdam tɩ b yɩɩnd radyo wã tɩ "Burkĩn yaal-yaal ka Burkĩn ye. . . ". Yɩɩlã kell n paa mam zugẽ wã tɩ tãag rũndã.
Mam sã n get nin-kʋʋra sẽn yãk neb na maan 700 wā yõor la kɩt tɩ neb sẽn ta 500 000 zoe n bas b zagse, b pʋto, b tʋʋmã, d segd n soka d mens n yese d burkĩndã kẽe yɛɛnẽ.
La pipi, d sõmb n soka d mens n gese, burkĩnd meng yaa bõe?
Burkĩnd yaa ned sēn ka sakd kɛgr zʋgo. Kɛgr me yaa fo sẽn mi f sũura pʋg tɩ ka sakde, ka zems ye. Tɩ yaa yirẽ-beedo, wagdem, pʋ-lika, yoobe, wẽnem. . . tɩ b ka sokd yãk f to yõor yaalem ye.
Burkĩnd ka tar tũudem ye. A ka tar buud ye. A ka tar kõgb ye. Fo yaa nin-salbga, tɩ f yaa nasaara; fo yaa Kirist neda, more, maand-kʋʋda, burkĩnd yaa burkĩndi.
D sã n ges neba b sẽn kʋ wã, fãa yaa pʋ-toogo, nen-kɛglem, wẽnem yĩnga. Yaa neb sẽn boond b mens tɩ burkĩn-bi n kʋʋd b burkĩn-bi taase. Kayto!
Burkĩnd ka yʋʋr ye. A ka fuug n yeegdẽ ye. A ka neoodã n pidgdẽ ye.
Burkĩnd yaa zɩɩm. A yaa yĩng kōbgo. A yaa vʋʋsem.
Burkĩnd Võore
Burkĩnd yaa tɩɩga. A womd a biis ned sẽn ka yãt n tudgi.
Fo sẽn karemdã, fo yaa burkĩn bɩ? Burkĩn yaal-yaal ka burkĩn ye. Burkĩn saka kũum n zoe yãnde. Burkĩn dɩkd a yõor n kõ tẽng sɩd yĩnga. Tɩ wa n yaa waoore, naam, pãng la ligd yĩng la fo na n faoolem f menga . . .
Ninsaal fãa yõor yaa wa rʋk walgo. A ka zɛɛd meneng ye. Fo naamã yaa, a na n nafa fo yaoogẽ wã bɩ? Fo pãnga bɩ f arzɛka yaa, fo sã n wa menem wa rʋk waolg yaa, b na maneg foo wãn-wãna?
Burkĩn yaal-yaal ka burkĩn ye. Burkĩn saka kũun n zoe yãnde. Burkĩn dɩkda a yõor kõ tẽnga!
Gom-sigdimã yita Célestin Tapsoba nengẽ
Commentaires
Enregistrer un commentaire